„Мала криза“ во ДОЈЧЕ БАНК, големи проблеми за еврото: До кога ќе оди надолу?
Објавено во: Свет 01 Октомври, 2016
Дојче Банк и релацијата со еврото, нераскинлива приказна која може да има и неубав крај? Сепак никој не верува во ова и покрај тешките моменти на гигантот, кои пак силно се рефлектираат на заедничката европска валута.
Курсот падна во петокот на најниското ниво во последните два месеца во однос на швајцарскиот франк, а ослабе и во однос на другите значајни валути.
Причината се бара во загриженоста за најмоќната „Deutsche Bank“.
Акциите на Deutsche Bank поевтинија последниов период откако банката призна дека има проблем со својот имиџ кај инвеститорите, со оглед на новите стравувања за нејзината стабилност, потсетуваат агенциите.
Најголемиот германски кредитор го очекува и плаќање казна од 14 милијарди долари, по налог на министерство за правда во Вашингтон, а поради неправилности во врска со продажба на лоши хартии од вредност поткрепени со хипотеки во периодот пред финансиската криза од 2008 година.
Швајцарскиот франк вчера го достигна највисокото ниво во последните осум седмици во однос на еврото, од 1,08125 франка за евро. Еврото, исто таа, ослабе за 0,4 отсто и во однос на американскиот долар, на 1,1177 долари, а беше во минус од 0,6 отсто и во однос на јапонскиот јен, лизнувајќи се на 112,77 јени.