Малите акционери се погласно ја негодуваат зделката со „Дуферко“, од „Макстил“ велат - таа ќе донесе подобар резултат за компанијата

Добивај вести на Viber

Што ќе се случи утре на Собранието на акционери на компанијата „Макстил“, е прашање кое се поставува пред утрешната седница, а ќе биде многу интересно за инвеститорската јавност во земјава.

Ова Собрание уште пред еден месец беше закажано за денеска, но беше одложено за еден ден, поради одржувањето на предвремените парламентарни избори. 

Собранието на акционери на „Макстил“, пак, е интересно од причина што во рацете на малите акционери на компанијата се зделки „тешки“ над 35 милиони евра, и дали тие ќе се реализираат, ќе зависи токму од овие ситни сопственици на акции.

Како што е познато, Законот за трговски друштва им овозможува екслузивно право на малите акционери да одлучуваат за зделки на компаниите кои се поврзани со поголемите акционери.

А во случајот со „Макстил“, „Дуферко“ контролира 81,78 отсто од акциите на челичната компанија. Или попрецизно, податоците на Централниот депозитар за хартии од вредност говорат дека „Дуферко скоп инвестмент лимитед“ поседува 62,4 отсто од акциите, додека, пак, другата фирма која е исто така на оваа компанија, „Дуферко скоп ЛТД“ располага со 19,38 проценти од акциите.

Наспроти доминантниот акционер „Дуферко“ со 81,8 отсто од акционерскиот капитал, остатокот од акциите во „Макстил“, односно 17,51 отсто, се распрснати кај огромен број мали акционери, дури 5.357 домашни физички лица. 

ОД НИВ ЌЕ ЗАВИСИ

Токму овие ситни акционери денеска ќе треба да го кажат својот конечен збор за зделките кои се склучуваат меѓу „Макстил“ и „Дуферко“. Ова од причина што, согласно Законот, „Дуферко“ во ова гласање би имал конфликт на интерес, па затоа зделките мора да ги одобри мнозинството од 5.357 домашни акционери.

А токму дел од тие мали акционери, на еден ден пред гласањето, поставуваат поголем број парашања и критики до главниот акционер. Тие не се откриваат јавно, но говорат дека менаџментот поставен од главниот акционер, односно „Дуферко“, досега не покажал дека води грижа за останатите акционери, ниту, пак, добиле сатисфакција во форма на дивиденда.  

„Тој менаџмент, како претставник на мнозинскиот акционер, низ годините наназад, со ниту еден потег не покажа дека води грижа за останатите акционери. Цената на акциите на ‘Макстил АД Скопје’ на Македонската берза практично ја покажува таа негрижа сите овие години. Компанија со приход од преку 100 милиони евра, на пазарот да вреди смешни 18 милиони евра? Едноставно не ми е јасно како очекуваат некој малцински акционер да го поддржи ‘Дуферко’ во овие зделки? Дали акционерите добиле сатисфакција во форма на дивиденада или целата добивка од трансакциите завршува кај ‘Дуферко’? Вредноста на компанијата во моментов е за 75 отсто пониска од цената по која е приватизирана команијата пред 25 години, а во и тоа време компанијата била еден од најголемите контрибутори во националниот БДП на Македонија и учествувала со 7 проценти во извозот“, вели за Фактор еден од малцинските акционери кои бараат да останат анонимни.

Според нив, секаде во светот, па и во земјава, бројни се примерите каде менаџментот кој што верува во компанијата во која работи, интезивно се стекнува со акции од компанијата. „Како и да е, односот на менаџментот и мнозинскиот акционер кон акционерството не е на ниво на стандардот на повеќето компании кои котираат на нашата берза. Многу далеку е и од било кој стандард во оваа област во светот“, велат овие малцински акционери.

Коста Костадиновски од „Илирика“, еден од поголемите малцински акционери во компанијата, вели дека будно ја следат компанијата. Тие немаат заземено став по однос на зделката, туку, како што велат, се многу позаинтересирани за продажба на нивните акции.

„Ние како институцинален акционер немаме некоја значајна позиција во акционерската структура, но будно ја следиме компанијата. По однос на зделката, се уште немаме завземено став дали ќе учествуваме на закажаното собрание. Како што стојат работите во моментов, многу позаинтересирани сме за продажба на нашите акции, отколку за активно учество во собранијата на компанијата“, вели Костадиновски.

Фактор постави прашања и до „Макстил’“ кои се однесуваат на утрешното акционерско собрание. Побаравме од компанијата одговор зошто малцинскиот акционер треба да ја гласа оваа зделка и кој е неговиот интерес.

МАКСТИЛ - ГИ ИСПОЛНИВМЕ СИТЕ ОБВРСКИ

Од „Макстил“ велат дека ги исполниле сите обврски, и дека токму оваа зделка треба да овозможи подобар финансиски резултат на компанијата.

„Потребата за одобрување на зделки со поврзани страни од страна на малцинските акционери е дел од законските обврски на акционерските друштва. Идејата на овие законски прописи е заштита на правата на малцинските акционери во акционерските друштва каде што има еден мнозински сопственик, кој, во отсуство на законски прописи, би можел да ги надгласа малцинските акционери и да направи друштвото да склучи зделка со друго друштво поврзано со мнозинскиот акционер во која што корист ќе има исклучиво мнозинскиот акционер. Затоа за вакви зделки се исклучуваат гласовите на мнозинскиот акционер и за нив треба да гласаат само малцинските акционери. Меѓутоа, друштвото е обврзано ваквата зделка да ја поднесе до независен ревизор, кој што треба да одлучи дали истата е фер, на корист на сите акционери и дали е во согласнот со законите на државата. Макстил во целост ги исполни овие обврски и се надева дека малцинските акционери ќе ја поддржат зделката, која во крајна линија би требало да овозможи подобар резултат на друштвото. Би сакале да ја искористиме оваа прилика и да информираме дека без поддршката од мнозинскиот акционер (DITH – Duferco International Trading Holding) во изминативе години опстанокот на Макстил ќе беше ставен под голем знак прашалник“, нагласуваат од „Макстил“.

На нашето прашање, пак, што презело раководството за да ги анимира малцинските акционери да се појават на Собранието и да ја поддржат оваа одлука, од оваа компанија одговараат:

„Во согласнст со позитивните законски прописи ги споделивме сите потребни информации до берзата, веб страницата на Макстил и овозможивме увид во истите во седиштето на друштвото. Сите акционери кои побараа дополнителини информации беа целосно информирани за корисноста од оваа зделка и сметаме дека успеавме да ја образложиме потребата од оваа зделка до сите акционери кои тоа го побараа“, објаснуваат од компнијата.

Поставивме и конкретно прашање до раководството на „Макстил“, дали после оваа зделка малцинските акционери може да очекуваат дивиденда?

„Многу е неблагодарно во овој момент на пандемија на корона вирусот и сите економски последици од неа, да се зборува за дивиденди кои зависат од резултатот на крајот на годината, финанскиската ситуација на друштвото, ликвидноста, обврските кон доверителите итн. Согласно објавената предлог-одлука за претстојното Собрание на акционери, а во согласност со позитивните законски прописи, со добивката остварена во 2019-та година, ќе се покријат загубите на друштвото од минатите години. Имено, друштвото мора да ги покрие сите загуби од изминатите години, како би можело дел од добивката да исплати како дивиденда. Во секој случај, предлог-одлуката за распоредување на добивката од 2019-та година е предмет на одобрување на претстојното Собрание на акционери. Какви ќе бидат условите на крајот на 2020-та година е многу неблагодарно да се прогнозира“, потенцираат од „Макстил“.

ЗДЕЛКАТА ТЕЖИ 34 МИЛИОНИ ЕВРА

А какви всушност зделки треба да бидат гласани на утрешното собрание на акционери?

Станува збор за неколку зделки што треба да добијат „благослов“ од малите акционери, но главната, или најголемиот „капиталец“ од нив, е Договорот за преработка помеѓу „Дуферко СА Лугано“ и „Макстил“, кој во апсолутен износ тежи дури 34 милиони евра.

Во релативен износ, пак, зделката зафаќа дури 31,76 проценти од книговодствената вредност на имотот на друштвото за минатата година. Овде се работи за Договор за преработка на старо железо и челичен полуфабрикат, односно челични слабови - во челични лимови, што траба да биде направено од страна на „Макстил“, а вкупната вредност на таа деловна соработка за годинава се очекува да изнесува 34 милиони евра.

Нина Нинеска-Фиданоска