Меурот наречен Јавен Долг ќе се распрсне по изборите!
Објавено во: Финансии 02 Ноември, 2016
За само девет месеци вкупниот јавен долг е зголемен за 532 милиони евра, при што заклучно со третиот квартал достигна 4 милијарди и 750 милиони евра. Ова значи дека секој граѓанин должи по 2.370 евра.
Според податоците од Министерството за финансии пораст има кај државниот долг кој од 37 отсто од БДП во вториот квартал, сега е зголемен на 41,9 отсто. Во државниот долг спаѓа долгот на централната Влада, јавните фондови и општините. Надворешниот долг во третиот квартал се искачи на 3,3 милијарди евра. Ваквиот тренд на јавниот долг, го отвори прашањето, колку ова ниво на јавен долг е одржливо и дали ја преминуваме црвената линија?
Дел од економистите сметаат
дека ова ниво е очекувано и е последица на годинешната еврообврзница. Проблемот
не е висината на долгот, проблемот е неговата намена, односно трошењето на овие
средства често беше за алиментација тековните потреби, односно зголемените
пензии и социјалата, вели за Фактор, универзитетскиот професор Марјан Петрески.
„Тоа што долгот надмина 50% од БДП беше сосема извесно, како последица на позајмувањето средства од меѓународниот пазар преку последната еврообврзница од 450 милиони евра. Проблемот не е висината на долгот, проблемот е неговата намена, односно трошењето на овие средства често беше за алиментација тековните потреби, односно зголемените пензии и социјалата. Тоа е линијата на неодржливост на јавниот долг. Очекувам дека после изборите, ќе настане вразумување, без оглед кој ќе ја формира Владата, односно свесноста за фискалниот меур или меурот на јавниот долг ќе биде висока и ќе се води политика на стабилизација на јавниот долг околу сегашното ниво и позајмување за строго наменски цели. Ова го кажувам од причина што и двата политички кампуса во овој предизборен период се расфрлаат со најразлични ветувања, па би било добро да им укажат на граѓаните и како сите тие трошења ќе се финансираат, за да се постигне целта за стабилизирање на долгот“, вели Петрески.
Т.С