Добивај вести на Viber
„На задоволство на работниците и нивните претставници, Градоначалникот Митко Јанчев позитивно одговори и ги прифати барањата на синдикатите и платите на сите вработени во општината и јавните комунални претпријатија и ТПЕ во Општина Кавадарци ќе се усогласат за 2.806 денари во нето износ.
Градоначалникот Митко Јанчев и Претседателот Димовски се согласија дека за да се исполни ова ќе бидат формирани нови синдикални организации како во Општина Кавадарци каде што ќе се склучи колективен договор со УПОЗ така и спогодби во Јавните претпријатија со Синдикатот СУТКОЗ“, се вели во соопштението од Синдикатот.
Претседателот на ССМ Димовски и Секретарот на УПОЗ Трипуноски изразиле задоволство од постигнатите решенија и од пристапот на градоначалникот Јанчев, со што, како што пишуваат во соопштението, тој докажува дека е општествено одговорна општина која се залага за унапредување на работничките права.
„Со постигнатата согласност, а со потишување на нов Колективен договор за вработените во Општина Кавадарци и спогодбите во Јавните претпријатија ЈП Комуналец, ЈП за јавни паркиралишта Паркинг и спортска сала Јасмин ќе се зголемат платите за 2.806 денари.
Примерот на Општина Кавадарци и Градоначалникот Митко Јанчев кои се пример на другите полиња, станува најдобриот пример за почитување на работнички права кој треба да го следат и останатите општини, со оглед на фактот што се обезбеди ова право на работниците по пат на социјален дијалог, а работниците ќе ги уживаат правата за зголемување и усогласување на нивните плати согласно порастот на минималната плата за 2.806 денари“, се вели во соопштението од Синдикатот.