МНР ги осуди политиките на омраза и нетрпение на протестите во Солун
Објавено во: Македонија 22 Јануари, 2018
Македонското министерство за надворешни работи ги осуди политиките на омраза и нетрпение на протестите во Солун, особено што истите доаѓаат во период кога меѓу Македонија и Грција се прават напори за подобрување на односите и решавање на споровите.
Владата на Република Македонија продолжува искрено да ги гради мерките на доверба со Република Грција со цел достоинствено да придонесеме кон решенија на отворените прашања во интерес на граѓаните на двете земји.
Министерството за надворешни работи на Република Македонија е уверено дека целиот регион и нашите две земји се на вистинскиот пат на доброседство кој ќе резултира со исполнување на евроатланските интеграции на нашата земја, како и стабилност и економски развој на целиот регион.
За жал сѐ уште се случуваат изолирани инциденти како тој во Солун, предизвикани од поединци и групи кои сѐ уште живеат во минатото и во политиките на конфронтација и национална изолираност, чии активности ги осудуваме како политики на омраза и нетрпение.
Мнозинството граѓани сакаат да развиваат блиски и пријателски односи со што придонесуваат кон унапредување на соработката и перспективите меѓу двете земји.
Протестите во Солун беа организирани од повеќе националистички групи, како и од свештеници на грчката црква кои имаат радикални ставови против Република Македонија во обид да предизвикаат раздор на грчката политичка сцена со прогласувањето на предавници и патриоти. Осуда на протестите имаше и од солунскиот градоначалник Бутарис.