Момче и родители загинаа кај вулканот Солфатара во близина на Неапол

Добивај вести на Viber

Тричлено италијанско семејство загина кај вулкан близу Неапол. 

Момче и родители загинаа денеска, кога под нив се сруши тлото на просторот на кратерот на вулканот Солфатара во близина на Неапол.

Жртвите се туристи од северна Италија, 45-годишен маж, 42-годишна жена и 11-годишен син. Помладиот син, седум години, не паднал во дупката и е неповреден. Тој преживеал затоа што отишло во потрага по помош.

Се верува дека момчето се онесвестило поради гасовите. Родителите се обиделе да го спасат, но кратерот се срушил, објави Гардијан.

Италијанските пожарникари изјавија дека извадиле три тела од плитката дупка во делот од кратерот на вулканот Солфатара што е ограден за туристите. 

„Или имало мала експлозија или земјата едноставно пропаднала под нивната тежина и паднале во дупката“- изјави портпаролот на италијанската противпожарна служба, Лука Кари. 

Кажа дека несреќата се случила во оградениот простор.

Причината за смртта ќе биде официјално утврдена по обдукцијата, а пожарникарите кои беа на местото на настанот, велат дека жртвите најверојатно настрадале од жешките гасови што излегуваат од земјата во пределот на кратерот.

Солфатара е еден од многуте вулкански кратери во областа на Кампи Флегреи 20 километри западно од Неапол, кој за туристи е отворен уште од 1900 година. Од земјата во оваа област се ослободуваат водни пареи од 160 степени Целзиусови.