Москва: 143 убиени досега, 28 трупови пронајдени во тоалетите

Добивај вести на Viber

Бројот на загинати во крвавиот терористички напад на концертно место во близина на Москва сега изнесува 143. Во исто време, руските власти уапсија вкупно 11 лица, од кои четворица се директно инволвирани во масакрот.

Се потсетува дека одговорноста за нападот, кој беше најсмртоносниот во Русија во последните 20 години, ја презеде терористичката организација „Исламска држава“. Сепак, Русија вели дека истражува поврзаност со Украина, и покрај тоа што Киев негираше каква било вмешаност во вчерашните настани.

Безбедносната служба ФСБ објави дека „сите четворица терористи“ се уапсени додека се движеле кон украинската граница и дека имале контакти во Украина. Известија дека тие се префрлени во Москва.

„Сега знаеме во која земја овие крволочни копилиња планирале да се сокријат од потрагата, Украина“, изјави портпаролката на Министерството за надворешни работи Марија Захарова на Телеграм.

Рускиот Истражен комитет соопшти дека некои од жртвите починале од рани од куршуми, а други во голем пожар што избувнал во комплексот. Има информации дека вооружените напаѓачи го подметнале пожарот користејќи масло од канистри што ги носеле во ранците.

Луѓето почнаа да трчаат во паника. База, весник со контакти во руските безбедносни и полициски служби, објави дека 28 тела биле пронајдени во тоалет и 14 по скалите. 

Кремљ соопшти дека шефот на ФСБ Александар Бортников му рекол на претседателот Путин дека „четворица терористи“ се меѓу уапсените и дека неговата агенција работи на идентификување на нивните соучесници.

Од своја страна, рускиот пратеник Александар Кинштајн изјави дека напаѓачите избегале со возило „Рено“, кое синоќа било забележано од полицијата во областа Брјанск, околу 340 километри југозападно од Москва, при што возачите не ги почитувале упатствата да застанат.

Според Кинштајн, во возилото биле пронајдени револвер, магацин за огнено оружје и пасоши од Таџикистан.