Има ли начин државата да ги спречи граѓаните да се обложуваат на странски интернeт страници

Добивај вести на Viber

Колку пари се одлеваат од земјава поради нелегалното приредување на игри на среќа од страна на странски приредувачи на интернет игри на среќа? Владата ќе се обиде да стави ред и да најде начин како да го спречи ова. 

Владата имено вчера го задолжи Министерството за финансии да достави информација со предлог решенија  како да се спречи одлевањето на паричните средства по основ на противзаконито учество на македонските граѓани  во странските интернет игри на среќа, како да се спречи пристапот на македонските граѓани до наведените интернет страни на кои се организираат игри на среќа од страна на правни субјекти кои немаат соодветна лиценца согласно Законот и како да се следат паричните приливи до граѓаните стекнати по овој основ.

За оваа појава од поодамна се алармира но немаше реакција.

Моментално, не се почитува законската забрана која ги ограничува нашите граѓани за учество во игри на среќа на странски веб страници. Тоа води кон значително учество на наши граѓани на тие сајтови и значително одлевање на девизни средства од нашите граѓани во другите држави каде што се регистрирани тие приредувачи. Ова е лошо од повеќе аспекти. Прво, државата губи девизни средства и губи дел од фискализацијата на приходите, доколку тие приредувачи се во нашата земја. Второ, отсуствува во одреден степен заштита на учесниците на игрите на среќа кои се играат на странски сајтови.

Професорот Сашо Климовски кој е единствениот што има учебник за оваа проблематика и го предава предметот на Правниот факултет во разговор за Фактор тврдеше дека законодавецот треба да размисли да интервенира во Законот за игрите на среќа на тој начин што ќе воведе механизам на операционализација за забраната за учество на лица од нашата земја во игрите на среќа, организирани од страна на странски интернет страни, која е утврдена во членот 19 од Законот за игрите на среќа и за забавните игри. 

А.Т.