Најбараниот за тероризам Сириец пристигнал во Германија како бегалец
Објавено во: Свет 09 Октомври, 2016
Дваесет и две годишниот Сириец, баран во Германија за подготовка на наводен бомбашки напад, пристигнал во земјата како бегалец, соопшти портпаролката на истрагата во провинцијата Саксонија.
Според „Шпигел", Џабер Албакр дошол во Германија во февруари 2015 година, неколку месеци пред големиот миграциски бран есента истата година, а во јуни 2015 година добил статус на бегалец, наведува Франс прес.
Напорите за пронаоѓање на мажот продолжуваат. Засилена е контролата на станици и аеродроми. „Стравот од тероризам владее во цела Германија!" - пишуваше денеска на веб-страницата на „Билд".
Албакр им побегна вчера на полицајците кои дошле да го пребараат станот во кој живеел во град Кемниц, по сигнал на германското внатрешно разузнавање дека мажот може да пристапи кон акција.
Полицијата открила во станот неколку грама силна експлозивна супстанција.