Од партијата на Љубчо Георгиевски бараат правен доказ дека Ванчо Михајлов бил соработник на фашизмот
Објавено во: Македонија 01 Февруари, 2023
Oд партијата на екс македонскиот премиер, Љубчо Георгиевски, ВМРО-НП бараат власта да докаже дали Ванчо Михајлов е соработник на фашизмот.
Според нив, поради нагласувањата дека треба да се забрани и затвори клубот „Ванчо Михајлов“ поради контроверзноста на неговиот лик и негова наводна колаборација со фашистичките власти и прашуваат дали државата има некаков доказ кој укажува на негова наводна соработка со фашизмот. Од партијата, велат дека тој доказ треба да е правно поткрепен и во Македонија, но и во Европа.
„ВМРО-Народна партија смета дека секое паушално обвинение кое не е правно поткрепено од македонскиот или меѓународниот правен систем само ја зацврстува несериозноста и доведува до низа историски небулози кои пак на крајот завршуваат како монети за поткусурување и алатка за нови поделби во државата“, стои во соопштението.
Велат дека „ако во Југославија, но и во меѓународното право постоел процес кој донел заклучок дека Ванчо Михајлов е докажан соработник со фашизмот тогаш добро е јавноста да биде запознаена и да престанат сите недоречености со ликот и делото на овој човек“.
Клубот е отворен минатата година, а по него Бугарите отворија и клуб во Охрид. Сега е во најава дека бугарски клуб ќе има и во Куманово. Клубовите во Битола и Охрид беа цел на напади. Имињата на клубовите поттикна контроверзии во македонската јавност.