ОЏАЧАРИ: Ни требаат, а сепак се дефицитарни

Добивај вести на Viber

Наближува почетокот на грејната сезона, со што е неопходно да се исчистат оџаците.

Иако се потребни, сепак кај нас оџачарите се дефицитарни. Оџачарските сервиси се бројат на прсти. Мал е бројот на млади луѓе кои би се обучиле и би станале оџачари. Јасмина Атанасова Симјаноска, дипломиран оџачар кој работи на едукација за оџачарство, консултант вели дека оние кои пројавуваат интерес за оваа професија се мажите, а досега кај неа на обука поминале само две жени. Иако струката е дефицитарна, сепак не може да се каже точна бројка колку оџачари се потребни во земјава.

„Јас дипломирав во 2015 година. Никој не се запишува во формално образование за струка оџачар, иако постои можност за тоа од 2017 наваму. Луѓето не се заинтересирани... Сите сакаат лесно. Толку е едноставно“, вели таа.

Од економски аспект додава дека оваа професија може да донесе добар приход. Домаќинствата треба да практикуваат редовно да ги чистат своите оџаци за да не дојде до несакани последици или пожар. Како и во секоја друга професија, така и во оваа, подобро е да се повика стручно лице, отколку граѓаните сами да ги чистат оџаците.

„Исплатливо е. Вообичаена цена за оџак за куќа е 1.200 до 1.500 денари, ако редовно се чисти може и 1.000 денари (не само инцидентно, кога имаме проблем). Младите не ни знаат дека воопшто постои таква професија, како и 80% од Македонците. Мислат дека секој сам треба да си чисти, кога има проблем со затнување на оџакот, и за тоа најголем показател се пожарите. Стручноста и компетентноста не паѓаат од небо, за нив треба сериозна обука под надзор на стручни лица“, објаснува Атанасова Симјаноска.

Таа ги обучува оџачарите во Македонија и кај неа полагаат за да добијат сертификати. Постојано работи на унапредување на професијата и вели дека на оџак можат луѓето да ја видат само доколку ја контролира работата на некој од кандидатите.

Секоја зима во медиумите има вести за запалени куќа од оџаци, понекогаш и со човечки жртви.

Луѓето кои долго време се во професијата раскажуваат и дека има семејства кои долги години не ги чистат оџаците со што неизбежно е да не дојде до запалување.