Охридската архиепископија следна тема на историската комисија
Објавено во: Македонија 04 Април, 2022
Последна тема на дискусија на мешовитата бугарско-македонска комисија за историски прашања е Охридската архиепископија. Ова го потврди копретседавачот Драги Георгиев, кој вели дека и тука македонската и бугарската страна тргнуваат со дијаметрално спротивставени тврдења и ќе треба да се најде средина.
Георгиев за Сител вели дека воопшто не се дискутира за идентитетот на Цар Самоил и дека за него е постигната само прелиминарна препорака. Но, што точно ќе пишува во македонските учебници, односно какви препораки ќе даде Комисијата ќе се знае откако ќе завршат целокупните преговори за средновековието. Препораките ќе бидат доставени до Владите на двете држави, а тие ќе треба да ги усвојат. Но, начинот на кој ќе биде претставена самоиловата држава ќе зависи од самите автори.
-Ние препорачуваме на ученикот да му бидат претставени различните перцепции од светските медијависти на тој настан, на таа држава или ако станува збор понекогаш за одредена личност. Дека постојат различни перцепции, дека не постои една единствена вистина. Мора да бидат застапени повеќе перцепции, како што постои во самата историографија и учениците потоа сами да почнат, доколку сакаат се разбира, да изградат свој став за таа држава, вели Георгиев.