Онишченко планирал да отвори банка, но вели македонскиот пасош не е подобар од украинскиот
Објавено во: Македонија 25 Ноември, 2022
Kонтроверзниот украински бизнисмен Олександр Онишченко имал план да инвестира во банка и да се занимава со спорт. Контакти со политичари од Македонија немал.
„Политичари во Македонија не познавам. За да имате добар коњички тим, потребна е инвестиција барем од 2 или 3 милиони евра. Значи, затоа, не ми е јасно зошто би морал да му платам на некого? А македонскиот пасош, не е подобар од мојот украински или германски. Федерацијата ме побара и јас прифатив. Не знам зошто сега толку комплицираат. Коњите се мои, јас спонзорирам. Целиот овој скандал е поттикнат затоа што мислат дека ќе влезам јас во Македонија и ќе им го земам бизнисот со гас. Кажете им дека само со спорт се занимавам“, тврди Онишченко за Слободен печат.
Владата почна постапка за поништување на македонското државјанство кое тој го имал. Онишченко бил на црната листа на САД.
Во меѓувреме опозицијата не се откажува од одговорност на директорот на АНБ, Виктор Димовски откако негови оперативци не ги направиле потребните безбедносни проценки за украинскиот бизнисмен. Според пратеникот на ВМРО-ДПМНЕ, Антонијо Милошоски, поради овој случај нарушен е кредибилитетот на АНБ и на Димовски со што е загрозена размената на информации со партнерите.
Бизнисменот се наоѓа црната листа на САД од јануари 2021 година бидејќи е „член на руската мрежа за влијание врз американските претседателски избори што се одржаа претходната 2020 година“.
Американските власти тврдат дека Онишченко му предал „преработени аудиоснимки“ од наводните разговори меѓу поранешниот украински претседател Петро Порошенко и тогашниот потпретседател на САД, Џо Бајден, на Андриј Деркач, независен украински пратеник, за кој се тврди дека е прв човек на наводната мрежа на Кремљ.