Орце Ѓорѓиевски: СДСМ насилно го турка законот за двојазичност

Добивај вести на Viber

Орце Ѓорѓиевски од Извршниот комитет на ВМРО-ДПМНЕ на прес конференција го нападна Законот за употреба на јазиците како неуставен за што даде и подетално објаснување зад кое стои опозициската партија и ја обвини СДСМ дека насилно го турка законот кој ќе донесе двојазичност на целата територија на Република Македонија.

„Првенствено Членот 6 од законот вели дека институциите како што се: Собрание на Република Македонија, Претседател на Република Македонија, Влада на Република Македонија, судство, јавно обвинителство, Уставен суд на Република Македонија, Народен правобранител на Република Македонија, институциите во изборниот процес, образованието, науката, здравството, културата, при примената на полициските овластувања, во радиодифузната дејност, нотаријатот, извршувањето, инфраструктурните објекти, матичната евиденција, личните документи, финансиите, економијата, како и институции други области се обврзани по службена должност да обезбедат употребата, комуникацијата, но и постапките да се одвиваат на јазикот кој го зборуваат најмалку 20% од граѓаните во Република Македонија и неговото писмо доколку лицето, односно учесникот зборува јазик кој го зборуваат најмалку 20% од граѓаните во Република Македонија.

Овој член е во спротивност со ставовите 2,4 и 5 на Амандман 5 од Уставот на Република Македонија. Таму е дадена можност кој било граѓанин што живее во општина во која најмалку 20% од граѓаните зборуваат јазик различен од македонскиот во комуникацијата да го употребат својот јазик. Институциите им одговараат на македонски и на јазикот кој го употребува граѓанинот. Наместо тоа во предлогот на СДСМ чл.6 предвидува институциите да обезбедат задолжителна употреба само на еден јазик, во случајов албанскиот. Со тоа директно се дискриминираат помалите заедници во Република Македонија.

Членот 22 од законот за двојазичност кој пропишува глоба во износ од 4.000 до 5.000 евра во денарска противвредност за прекршок ќе се изрече на органите кои нема да ги почитуваат одредбите од овој закон. Додека глоба во висина од 30% од одмерената глоба ќе му се изрече и на службеното лице.

Овој член не е во согласност со член 8 став 1 алинеја 3 од Уставот на Република Македонија.

ВМРО-ДПМНЕ е за унапредување на правата на заедниците. Но тоа мора да биде исклучиво во согласност со Уставот и законите на Република Македонија. ВМРО-ДПМНЕ бара и инсистира во Законот за употреба на јазици да се прошири употребата на  помалите етнички заедници во Република Македонија, односно Турците, Бошњаците, Србите, Ромите, Власите и останатите.

Интегрирано општество, просперитетно со еднакви можности за сите ќе имаме само ако го следиме Уставот и законите и ако се почитуваме еден со друг. ВМРО-ДПМНЕ се залага и се бори за тие вредности“ истакна Ѓорѓиевски.

Се очекува ВМРО-ДПМНЕ да поднесе голем број на амандмани во Собранието, со цел усогласување на законот со Уставот на државата, но засега нема информации дали преку оваа тактика ќе се направи обид за целосно блокирање на процедурата во амандманска расправа.