Османи: Првите економски дипломати ќе бидат испратени во 2021, откако ќе завршат курс

Добивај вести на Viber

Првите економски промотори-дипломати ќе бидат испратени во странство во 2021, рече денеска министерот за надворешни работи Бујар Османи, презентирајќи го концептот за кој Владата наложи за кратко време да се формира експертска меѓуресорска работна група.

Оваа група треба да одреди кои земји ќе бидат таргетирани за економските советници и кои ќе бидат економските дипломати што ќе ја извршуваат таа задача според нивните квалификации. Османи објасни дека ова нема да бидат амбасадори, туку ќе бидат испратени во рамки на дипломатско-конзуларните претставништва.

- Станува збор за концепт врз основа на сите претходни искуства и компаративна анализа со земјите со кои имаме слични приоритет во економијата. Тоа ќе бидат претставници експерти, но и луѓе од бизнис секторот. Приоритет во изборот ќе имаат дипломатите кои имаат искуство во економската дипломатија и тие ќе бидат испратени во економско-конзуларните претставништва, а ќе се бараат такви кадри и во другите министерствата. Треба да се напомене дека тие ќе бидат испратени откако ќе поминат курс организиран од МНР. Ќе има луше и од јавниот и од бизнис секторот, рече Османи.

Според шефот на македонската диопломатија, економските промотори во делокругот на својата работа ќе имаат задачи да направат контакт со бизнисите во странство, да ја ослеснат трговија, да потпишуваат договори и да работат на подготвување на инфраструктура.

Владата на почетокот од неделава го задолжи Министерството за надворешни работи да ја формира меѓуресорската груша со консултации со Канцеларијата на премиерот, Кабинетот на вицепремиерот за економски прашања, Министерството за надворешни работи, Министерството за економија, Министерството за земјоделство, шумарство и водостопанство, Министерството за транспорт и врски, Министерството за финансии, Министерството за животна средина, Агенцијата за странски инвестиции и промоција на извозот, Агенција за промоција и поддршка на туризмот и Дирекцијата за технолошки индустриски развојни зони.