Османи со посета на Грција го засилува дипломатското темпо
Објавено во: Македонија 08 Јануари, 2018
Вицепремиерот за европски интеграции Бујар Османи ќе ја посети Грција и ќе оствари средби со повеќе политичари од државниот врв на јужниот сосед како дел од продолжување на дипломатското темпо за доближување на двете земји.
– Министерот за надворешни работи Никос Коѕијас, во вторник на 9 јануари ќе му приреди работен ручек на вицепремиерот на Поранешната југословенска Република Македонија, одговорен за односите со ЕУ, Бујар Османи, по повод неговата посета. Разговорите ќе се фокусираат на европски прашања од заеднички интерес. Господинот Османи, исто така, ќе се сретне со алтернативниот министер за надворешни работи, Јоргос Катругалос, соопштуваат од грчкото МНР.
Во оваа, како што грчките медиуми ја нарекуваат „раздвиженост“ на релација Скопје – Атина, ги споменуваат и посетата на генералниот секретар на НАТО на Македонија, новата рунда разговори на Нимиц со преговарачите на двете земји и евентуалната средба на македонскиот и грчкиот премиер во Давос, на маргините на Светскиот економски форум.
Вицепремиерот Османи, пред помалку од 2 месеци, во интервју за грчкиот весник „Катимерини“, рече дека постои позитивен моментум во односите меѓу Скопје и Атина, 2018 е златна година за решение, останувањето пред вратите на НАТО и ЕУ ќе има трагични последици и за земјата и за регионот и носи опасност за зголемување на руското влијание, и дека прашањето за името е итен приоритет за владата.