ОСТРИ САНКЦИИ: Што и забрани ЕУ на Северна Кореја и на граѓаните на таа земја?
Објавено во: Свет 10 Октомври, 2017
Европската унија одлучи да ги прошири санкциите против Северна Кореја во согласност со резолуцијата од 11 септември прифатена од Советот за безбедност на ОН. Ова станува јасно од изјавата на Советот на ЕУ, цитиран од светските медиуми.
"Советот повторно ги прошири ограничувачките мерки против Северна Кореја, носејќи секторски санкции, кои беа воведени преку резолуција 2375 на Советот за безбедност на ОН", гласи соопштението.
Од документот станува јасно дека новите санкции вклучуваат забрана за продажба на Северна Кореја на течен природен гас, увоз на ткаенини од земјата, како и ограничувања на извозот кон неа на преработени нафтени производи и нафта.
"Покрај тоа, земјите-членки нема да издаваат дозволи за работа на граѓани на Северна Кореја за влез или работа на нивна територија, бидејќи нивните приходи можат да бидат искористени за поддршка на нелегалните нуклеарни и ракетни програми на земјата", пишува во соопштението од Советот на ЕУ.
Брисел, исто така потсетува дека во моментов Блокот работи на можни дополнителни самостојни санкции против Пјонгјанг, кои да не се обврзани со одлуки на ОН.