По расистичките испади Бенон, сенката на Трамп, си оди од Белата куќа
Објавено во: Свет 19 Август, 2017
Стив Бенон, кој се сметаше за претседател од сенка, односно десна рака во советување на Доналд Трамп, повеќе нема да ја извршува функцијата стратег во Белата куќа, најмногу поради нападот на бели неонацисти кои не добија соодветна осуда и оградување од американскиот претседател што ја зовре јавноста.
– Шефот на персоналот на Белата куќа, Џон Кели и Стив Бенон се договорија денеска да биде последен ден на нивната соработка. Благодарни сме му (на Бенон) за се што направи, изјави портпаролката Сара Сандерс, без да прецизира дали тој поднел оставка или е разрешен од должноста.
Објавата на Сандерс уследи откако „Њујорк тајмс“ обелодени дека американскиот претседател Доналд Трамп им соопштил на своите соработници дека одлучил да го разреши Бенон.
Стив Бенон е главниот виновник за радикалната политика која ја создава Доналд Трамп бидејќи беше под негово огромно влијание.
Бенон е најнов функционер во низата блиски соработници на Трамп кои се повлекоа од неговата Администрација формирана пред само седум месеци.