Поднесена кривична пријава за Беким Мемети, кој филмски избега од затвор додека беше спроведуван

Добивај вести на Viber

МВР објави дека е поднесена кривична пријава за Беким Мемети, кој веќе е осуден на затворска казна за убиство која во Идризово требало да ја отслужува до 2040 година, откако во јануари рани затворски полицаец, кому му го одзел службениот пиштол од појас. Бегството се случи ноќеска на автопат кон Скопје, а целиот настан наликуваше на добро испланиран и во соработка со вработени од затворот.

„СВР Скопје поднесе кривична пријава против Б.М.(37) од Тетово, поради постоење основи на сомнение за сторени кривични дела „убиство во обид“ и „бегство на лице лишено од слобода“. На 12.01.2023 на автопатот „Пријателство“, додека бил вршен спровод на пријавениот, осудено  лице, од Казнено-поправната установа Идризово до Комплексот клиники „Мајка Тереза“ Скопје, тој одзел службен пиштол од вработен во затворската полиција и испукал еден проектил, со кој го ранил. Притоа, службеното возило застанало, а пријавениот излегол од возилото и влегол во патничко возило „ауди“ без регистарски ознаки и заминал“, објави МВР.

Затворската полиција тогаш била пресретната од неколку вооружени лица, комбето со кое се транспортирал затвореникот било застанато, имало пукање, полицаец е ранет во бешиката. Затвореникот бил изваден и заедно со вооружените лица се дал во бегство. Акцијата за бегство била планирана. На тоа укажува фактот што вооружените лица точно знаеле кога ранетиот затвореник ќе биде спроведен во болница, го знаеле возилото, а иако не потврдено, веројатно имале и дополнителни информации како што се бројот на полицајци кои ќе го носат затвореникот на лекување и трасата на движење. Затвореникот неофицијално, сам си нанел рана, поради која барал лекување. Непознато и нејасно е дали била повикана Брза помош или тој директно бил транспортиран.