Поголемата смртност од зачестени и подолги топлотни бранови
Објавено во: Свет 04 Август, 2018
Резултатите од студија објавена во списанието ПЛОС Медисин покажуваат дека стапката на смртност поради топлотни бранови може да се зголеми за 2.000 проценти во некои делови на светот до 2080 година
Деценија наназад научниците предупредуваат дека климатските промени ќе донесат поекстремни временски услови во целиот свет, од топлотни бранови до урагани, авторите истакнуваат дека ова е најголемата студија досега која ја истражува смртноста од топлотни бранови, за кои предвидуваат дека ќе зајакнат во зачестеност и интензитет.
„Идните топлотни бранови ќе бидат почести, посилни и ќе траат многу подолго“, смета професор Јунимг Гуо од Универзитетот Монаш во Австралија.
Во истражувањето биле опфатени 20 земји на четири континенти и авторите заклучија дека зголемувањето на смртноста е најверојатен на екваторот.
Најтешко погодена би била Колумбија, каде би можело да има 2.000 проценти повеќе предвремени смртни случаи поради екстремната горештина во периодот 2031-2080, во споредба со периодот 1971-2010, вели Гуо.Филипините и Бразил, може исто така да имаат зголемување на предвремените смртни случаи.
Еден од коавторите на студијата Антонио Гаспарини, кој е и експерт од Лондонската школа за хигиена и тропска медицина, истакна дека во моментов постојат неколку земји погодени од драстични топлотни бранови.
„Но, добрата вест е дека ако се намалуваат емисиите на стакленички гасови, тогаш влијанието ќе биде многу помало“, истакна Гаспарини.