ЗА ПРВ ПАТ ВО ЗЕМЈАВА ДОАЃААТ ZARA HOME и OYSHO - ќе ја имаме најголемата ZARA во регионот
Објавено во: Економија 12 Февруари, 2021
Светскиот моден магнат од Шпанија, Групацијата ИНДИТЕКС ќе закупи деловен простор за сите свои брендови, со што популарната седморка: ZARA, ZARA HOME, ОYSHO, МassimoDutti, Bershka, Pull and Bear и Stradivarius, ќе се најдена само едно место во Ист Гејт Мол.
Оваа информација за Фактор ја потврдуваат од Скопје Ист Гејт.
„Групацијата Индитекс постигна договор со Ист Гејт Мол за историски најголемиот закуп на малопродажен деловен простор во Македонија. Договорот предвидува закуп на малопродажна површина од 8.600 м2 за сите седум брендови. За прв пат на пазарот Групацијата Индитекс во Ист Гејт Мол ќе се појави со брендовите ZARA HOME и OYSHO, а брендот ZARA ќе се простира на повеќе од 4.600 м2, со што станува најголемата ZARA во целиот регион“, се вели во информацијата што ја добивме од компанијата.
Оттаму нагласуваат дека со оваа трансакција Ист Гејт Мол стратешки се позицинира како една од клучните малопродажни дестинации во регионот, обезбедувајќи притоа предуслови за стабилни инвестициски параметри на ниво кое вообичаено се бара од инвеститорите кои вложуваат во ваков тип на недвижнини.
„Со ZARA HOME, Ист Гејт Мол станува идна водечка дестинација за додатоци во домот при што купувачите ќе добијат можност да ги следат најновите трендови во ентериерниот декор и да имаат пристап до најновите колекции во ист момент кога ќе се појават на пазарот.
OYSHO e специјализирана модна марка за удобна примарна гардероба за дома, за спортски активности како и квалитетна долна облека. Нивните колекции се создадени за жените и ја следат линијата на мода и елеганција со удобност и квалитет.
Продавниците ќе бидат изградени според најновиот дизајн, автентичен на современиот имиџ на ZARA HOME и OYSHO ширум светот“, потенцираат од компанијата.
Велат и дека форматот на продавниците на Групацијата ИНДИТЕКС во Ист Гејт Мол, налага сите брендови да се презентираат со целото свое продуктно портфолио, обезбедувајќи со тоа широка палета на производи и диверзифитет во понудата пред македонските потрошувачи.
Фактор веќе пишуваше дека оваа есен скопјани, но и граѓаните од цела држава и пошироко, ќе имаат прилика да го посетат најголемиот и убедливо најрепрезентативниот шопинг центар во регионот, Ист Гејт Мол. Објектот интензивно се гради, а од компанијата велат дека активностите, и покрај проблемите и забавувањата кои ги наметна пандемијата, течат според планот, па инвестицијата ќе биде завршена во предвидениот рок.