Полицијата ги барала Грујевски и Бошковски на локации во Скопје, Велес и Охрид

Добивај вести на Viber

Од МВР информираат дека вчера во 21 часот Апелацискиот суд во Скопје до Министерството за внатрешни работи доставил наредби за спроведување на Г. Г. и Н. Б. во Истражниот затвор Скопје.

Иако телефонски Судот во 17 часот го извести МВР дека ќе бидат испратени наредбите, тоа се случи дури во 21 часот, кога МВР можеше да постапи согласно своите законски овластувања.

„Веднаш беше распишана национална потерница со која се спроведоа активности за приведување на осомничените. Tимовите на Министерството извршија проверка на објектите на адресите кои се пријавени како места на живеење на осомничените и проверки на повеќе локации на територијата на Република Македонија, поточно во Скопје, Велес и Охрид, за кои имаше оперативни сознанија дека осомничените ги користат за криење“ - стои во соопштението на МВР. 

Бидејќи лицата не се пронајдени, МВР, согласно законските надлежности, побара од Судот согласност за распишување на меѓународна потерница и по наредба на Судот веќе е распишана меѓународна потерница за Г.Г. и Н.Б.

Поранешниот шеф на Петтата управа, Горан Грујевски и другиот припадник на УБК, Никола Бошковски, се обвинети од Специјалното јавно обвинителство во случаите „Тврдина“ и „Таргет“.