Повредениот бугарски навивач во Чаир излезе од болница: Поради адреналинот не почувствував дека сум прободен

Добивај вести на Viber

Навивачот на Левски, 29-годишниот Драгомир Андонов, излезе од болница по прободувањето во Чаир кога бугарски државјани отидоа во оваа скопска населба со возила за да провоцираат пред фудбалскиот натпревар со „Шкупи“. Тој бил ранет во црниот дроб и во првите часови постоела опасност по неговиот живот.

Тој е категоричен дека „немало провокација од нивна страна“. Како што вели, „бевме на погрешно место во погрешно време“. Нападот се случил во една од населбите додека чекале на семафор. 

„Јас сум жив и здрав. Бев отпуштен синоќа. И сега се враќам во мојата нормална рутина. Стапнувам на нозе. Ги учиме лекциите и одиме напред“, тврди тој во синоќешното ексклузивно интервју за Нова.бг.

„Отидовме за забава. Беше во близина мечот, соседна земја, многу адреналин и искуство е да навиваш за твојот омилен клуб. Ние не сме од оние навивачи кои одат на натпревари за да прават проблеми - хулигани, вандали кои ја расипуваат агендата, прават проблеми. Се разликуваме од нив“, посочува тој.

Тој вели дека наводно групата која била нападната во Чаир случајно се нашла таму, односно дека залутала во градот.

„Не направивме апсолутно никакви провокации. Сообраќајот беше се погуст. Имаше семафор. Стигнуваме до раскрсница и се фаќаме во сообраќаен метеж - автомобилот сега тргнува, па застанува. Стоиме мирно и чекаме. Седам зад совозачкото седиште и од страна забележувам момче на околу 25-30 години како оди покрај колата. Го гледам на ниво со прозорецот и почнува да ме влече. Посегна по мојот шал и почна да влече. Кога се обидов да се повлечам, одговорот беше удар во окото. Бев помодрен и отечен. Постојано влечеше, не се откажуваше. Решив да ја отворам вратата. Момчињата почнаа да се спуштаат надолу. Повеќе луѓе се собраа зад момчето што го влечеше шалот. Еден од нив извади дрвен стап и со него ме удри по главата. Почнаа да пристигнуваат повеќе луѓе. Имам три конци“, истакнува Драгомир.

Според неговите зборови, тој и неговите пријатели се обиделе да се вратат во автомобилот и да ги затворат вратите. Токму во овој момент бил избоден „Подоцна сфатив дека тогаш сум бил избоден. Едно од момчињата го виде тој што ми го влече шалот низ прозорецот како замавнува 3-4 пати“, изјави Драгомир. И додава: „Мојата цел беше да се извлечам“. Ситуацијата се развила за помалку од 2 минути. И луѓето постојано доаѓаа, фрлаа цевки, шишиња, а во моментот кога успеав да се оттргнам, тие удрија во задниот прозорец и го скршија. Ја гледам и другата кола - нешто се фрла по нив. Беше како во филмовите, работите се развија толку брзо. Страшен шок. Главата ми крвари, крвав бев, а од адреналинот не сфаќам дека сум прободен. Застанавме да видиме колкава е штетата и чувствував дека целата маица ми е мокра. Кога гледам - ​​бојата се претвори од сина во кафена. Видов дека има многу крв, дека имам убодна рана. Едното момче со нас беше доктор. Даде прва помош. Тргнаа да бараат полиција“.

Пред болницата Драгомир загубил свест. Била потребна е трансфузија на крв и голема операција. „Им благодарам многу за она што го направија. Ме преврзаа и постојано ја следеа мојата состојба“, истакнува младиот човек.