Повторно истата казна за Гури и Алими од ДУИ за местење избори во Чаир
Објавено во: Македонија 14 Јули, 2023
Исмет Гури и Ејуп Алими повторно се осудени на по три и пол годишна казна затвор како поранешни функционери на ДУИ за уништување на изборен материјал, во случајот „Титаник 3“ познат по тоа што беше отворен од поранешното СЈО.
Кривичен суд им се судеше по вторпат, откако еднаш, Апелација ја укина пресудата. Гури е виновен затоа што за време на локалните избори во општина Чаир, во 2013 година, заедно со сведоците Блерим Мухаџери и Ќани Точи ги преправале записниците од гласањето. Додека обвинетитот Алими, е виновен зашто преземал противзаконски дејствија за уништување на изборен материјал.
Двајцата осудени преправале списи кои служеле за изборите и гласањето, со додавање и одземање на гласови.
„Судот потенцира дека една од основните претпоставки за владеење на правото е избирачкото право. Избирачкото право претставува услов без кои не може една земја да се претстави како демократска“, рече судијката Марија Клетничка.
Гури и Алими во 2020 година беа осудени на по три и пол години затвор, а во 2021 година, Апелација донесе одлука, предметот да се суди одново. Апелација даде напатствија за правна оценка на кривичните дела за кои се гонат, да се провери и кој кое дело го сторил. Поради ова имаше и ново вештачење, кое ги даде истите резултати како претходните.