ПОВТОРНО ТУРБУЛЕНЦИИ: Трамп почнува да ги исполнува ветувањата од кампањата-што ќе им направи на компаниите?
Објавено во: Свет 24 Јануари, 2017
Aмериканскиот претседател Доналд Трамп рекол на состанокот со бизнис лидерите дека ќе има „погодности“ за компаниите кои своите производи ги прават во САД.
Тој најави „значајни наметнувања на границите“ за компаниите кои производството го селат од земјата.
„Се што треба да направите е да останете. Не заминувајте. Не ги отпуштајте своите луѓе во САД“, рекол Трамп на состанокот на својот прв работен ден во Белата куќа.
Тој го повторил ветувањето од кампањата дека ќе ги намали прописите „за 75 отсто, можеби и повеќе“.
Трамп рекол дека сака да ги намали даноците за средната класа и компании „за некаде помеѓу 15 и 25 отсто“ од 35 отсто.
Трамп организирал доручек со десеттина бизнисмени меѓу кои и Елон Муск од Тесла, Мерлин Хјусон од Локид Мартин (Lockheed Martin) , Марио Лонџи од Ју-Ес стил (US Steel) и Кевин Планк од Андер Армора (Under Armour).
Новиот претседател на САД рекол дека сака да одржува вакви состаноци квартално.
Трамп потпишал и указ со кој го почнува повлекувањето на САД од трговскиот договор за Транспацифичкото партнерство.
Се очекува да потпише указ за спроведување на замрзнување на вработувањата во федералната влада.
Оваа вест доведе до турбуленции, доларот се повлече, а повеќето светски берзи ги потресе неизвесност.