Пресврт заради кој одекна најгласниот сон

Добивај вести на Viber

Приказната за еден од највлијателните говори на 20-от век започнува на 27-ми август 1963-та, ден пред неговата изведба, во хотелот Вилард во главниот град на САД. Д-р Мартин Лутер Кинг Џуниор, со уште седуммина луѓе, внимателно додаваат и одземаат од неговата содржина. Д-р Кинг бара говорот да биде сумиран во неколку главни точки што ќе му служат како патоказ во зборувањето. Присутните се претставници на различни засегнати групи.

Да се извлечат сите поенти во единствен манир - за времетраење од еден јавен говор е речиси невозможно. Очи во очи со оваа задача е исправен човекот кој со години е задолжен за вербалните излагања на д-р Кинг, Кларенс Б. Џонс. Токму од неговата книга „Зад сонот“, добиваме целосна претстава за важноста на говорот, а од таму и за величината на сонот.

Рано изутрина на 28-ми Август, копии од конечната верзија на говорот се доставени до медиумите. Неколку часа подоцна, д-р Кинг е исправен на говорницата и со единствен глас зборува за илјадниците обесправени. Или, подобро речено, за илјадници кои чекаат во ред да ги добијат своите човечки права.

На маршот во Вашингтон, под мото „Вработување и слобода“ а со цел ставање крај на расизмот во САД - присутни се повеќе од 10 илјади важни претставници од светот на општественото живеење. Дел од програмата е и изведба на женски госпел хор. Дел пак од истиот тој женски госпел хор - е Малаја Џексон - добра пријателка на д-р Кинг и 

долгогодишен соборец на линија на правата на црнците. Токму нејзиниот глас е орозот на епското во говорот на д-р Кинг.

Во првата половина од излагањето, д-р Кинг ревносно и често погледнува долу. Гледа во претходно изработениот говор, говор што претставува одредена варијација на тема, споредбено со она што го зборува два месеца претходно на собирот во Детроит. Токму на половина од говорот - Малаја Џексон - која во тој момент е дел од толпата што слуша, гласно му се обраќа на д-р Кинг. 

Му вели: „кажи им за сонот!“ а тој подзастанува и го трга листот настрана. Од тука натаму, тој воопшто не погледнува во листот, а токму ова е и моментот од кој неговото зборување добива на моќ. Моќ што ќе направи ова да биде еден од најзначајните моменти во историјата на нашата цивилизација.