Ребалансот носи рекорден дефицит, ќе ја ублажи ли кризата: Почнува расправата

Добивај вести на Viber

Почнува расправата за ребалансот на буџетот денеска во Комисијата за финансирање и буџет во Собранието. Со ова прекројување на државната каса и новите проекции, прогнозата за пад на БДП се ревидира надолу на минус 4,4 проценти. Расходите во годинешниот буџет со новиот ребаланс се зголемуваат за 162 милиони евра, а приходите остануваат на слично ниво. Приходите се позиционирани на 196, 4 милијарди денари, а расходите се планирани на ниво од 253 милијарди денари.

Поради потребите се зголемува буџетскиот дефицит на рекодни 920 милиони евра или 8,4 проценти од БДП. Владата ќе има потреба да позајми дополнителни 250 милиони евра кои како што рече министерот за финансии Фатмир Бесими ќе бидат од домашно задолжување.

Инаку ВМРО-ДПМНЕ поднесе околу 170 амандмани на комисиската расправа за ребалансот на Буџетот. Тимчо Муцунски изјави вчера дека амандамните се поврзани меѓу другото и предлог амандмани за повеќе средства за инфективните одделенија ширум Македонија и инфективното одделение во Скопје, и проекти за намалување на загаденоста.

Со дополнителните пари ќе се реализираат мерките од четвртиот пакет меѓу кои за Домашната платежна картичка – 1,6 милијарди денари (27 милиони евра). За Државна гарантна шема и царинска гаранција – 799 милиони денари (13 милиони евра). За грантови за игротеки, туристички агенции, ресторани за свадби се предвидени 5,5 милиони евра.

Комисиската расправа може да трае десет дена. После буџетот треба да оди на пленарна седница. 

А.Т.