Што ќе донесе април во однос на прашањето Србија-Косово?
„До крајот на март или почетокот на април ќе излеземе со предлог за решавање на Косово“, изјави претседателот на Србија, Александар Вучиќ, на гостувањето во телевизиската емисија „Кирилица“.
„Ќе излезам со предлог кој нема да биде: ‘Драги Албанци, ви даваме сè’. Станува збор за компромисно решение. Доколку тие не сакаат да разговараме, тогаш ќе имаме замрзнат конфликт“, рече српскиот претседател.
Инаку бурни реакции се појавија по изјавата на албанскиот премиер Еди Рама, Косово и Албанија да имаат заеднички претседател. На тоа се надоврза Вучиќ.
„Албанците не сакаат да разговараат, сакаат голема Албанија. Ние не сакаме голема Србија, туку да го сочуваме идентитетот на Србите, да имаме безбедност за Србите и во Хрватска и во Словенија и не бараме дел од нивната територија. Нам ни е важно Србите да се безбедни“, рече Вучиќ коментирајќи ја изјавата на Рама и додаде дека доколку ова се каже за Србите, тогаш ќе започне антисрпска кампања во сите светски медиуми.
