РИСТЕСКИ ГО ПОТВРДИ ИЗВЕШТАЈOT: Напишав 10 објави на Фејсбук и 2 агитациони текста за „Можеме“
Објавено во: Македонија 30 Мај, 2022
Универзитетскиот професор Темелко Ристески за Призма ја потврди автентичноста на извештајот што деновиве се појави на социјалните мрежи, а во кој тој до државниот секретар на Министерството за одбрана реферира што сработил во јули 2020 година.
Тој вели дека бил ангажиран со договор за дело во текот на 2019 и на 2020 година, како советник за правни работи за стратегиски одбранбен преглед, за што поднел извештај до надлежното министерство.
Но, покрај тоа што била побарана неговата стручност, во областа на правото и на одбраната, Ристески во извештајот до Министерството за одбрана ги навел и неговите активности на социјалните мрежи, кои се однесуваат на неговата поддршка до коалицијата „Можеме“, предводена од владејачката СДСМ, на тогашните предвремени парламентарни избори.