Русија повика на крај на светскиот поредок, доминиран од Западот
Објавено во: Свет 18 Февруари, 2017
Русија повика да се стави крај на светскиот поредок, доминиран од Западот.
Рускиот министер за надворешни работи Сергеј Лавров изјави дека Москва сака да создаде „прагматични“ односи со САД.
„Се надевам дека светот ќе избере еден демократски поредок - „постзападен“, рече тој за време на конференцијата за безбедност во Минхен, пренесе AFP.
Лавров исто така истакнал дека Москва сака да изгради односи со Вашингтон, кои се „практични, со меѓусебна почит и признание за нашата одговорност за глобалната стабилност“. “Двете страни никогаш не биле во директен конфликт“, рече тој, па дури и повика на „заеднички простор на добрососедски односи од Ванкувер до Владивосток“.
Конференцијата, која ќе трае до 19 февруари, собра во Минхен над 30 светски лидери, 47 министри за надворешни работи и 30 министери за одбрана. Меѓу нив е американскиот потпретседател Мајк Пенс и секретарот за внатрешна безбедност Џон Кели. Претходно денеска Пенс имал изјава во која ги повика европските членки на НАТО да одвојуваат повеќе средства за Алијансата. Покрај САД само четири други држави го исполнуваат ангажманот да трошат 2% од БДП за одбрана, истакна тој на конференцијата за безбедност во Минхен.
Оваа година форумот се гледа како првата можност Вашингтон да даде јасна позиција по клучни надворешно-политички прашања. Меѓу нив е и подобрувањето на односите со Русија, и покрај актуелната криза во Украина.