САД со нов закон ќе ја финансира федералната Влада до крајот на септември
Објавено во: Свет 27 Март, 2013
Американскиот претседател Барак Обама потпиша закон, кој беше изгласан минатата недела во Конгресот, за финансирање на активностите на федералната Влада до крајот на септември и за избегнување на стопирање на некои општествени услуги.
Потпишаниот документ го остава во сила автоматското кратење на буџетот во износ од 85 милијарди долари до 1 март поради несогласувањата меѓу демократски и републиканците за негово поништување.
Во законот е предвидено одделување на 87 милијарди долари за воени операции во странство.
Само некои федерални агенции како Пентагон добија адаптиран буџет, со цел да бидат намалени последиците од економските мерки во следните шест месеци, со што им се дава поголема флексибилност при воведувањето на дополнителните намалувања во нивните трошоци.
Сега вниманието е насочено кон следната етапа, договарањето на буџетот за финансиската 2014 година, која почнува на 1 октомври. Минатата недела Претставничкиот дом, во кој доминираат републиканците и Сенатот, каде мнозинство имаат демократите, изгласаа мошне поинакви верзии на буџетот.
Се очекува кон средината на следниот месец Обама да објави своја верзија на буџетот, во која ќе се заложи за зголемување на даноците на најбогатите домаќинства - мерка на која се противат републиканците.