САД: Забранети се малите пластични шишиња за вода
Објавено во: Свет 03 Јануари, 2013
Од Нова година во градот Конкорд во североисточната американска сојузна држава Масачусетс е забранета продажба на вода во мали пластични шишиња, а сите оние кои ќе нудат на продажба негазирана вода во шишиња помали од еден литар ќе треба да платат казна од 50 долари.
Градските власти наведуваат дека забраната може да биде укината само ако со новата мерка дополнително се оптовари буџетот на граѓаните. Инаку иницијатор за оваа забрана е 84-годишната Џејн Хил, која образложожила дека голем број од малите шишиња не можат да се рециклираат. Таа била поддржана од движењето „Забранете ги шишињата“.Од движењето тврдат дека водата во шише чини илјада пати повеќе од водата во чешма. Исто така се наведува дека Американците само во 2007 година искористиле над 50 милијарди пластични шишиња со вода, а биле рециклирани само 23 отсто, што значи дека 38 милијарди пластични шишиња биле фрлени во отпад.