СДСМ собра 10 потписи - Чека промена на дневен ред и гласање за нов спикер на Собранието

Добивај вести на Viber

СДСМ веќе ја исцрта стратегијата со која ќе направи обид да се стави крај на блокадата од страна на ВМРО-ДПМНЕ која трае веќе десетина дена со беспредметна расправа по точките од дневниот ред за комисијата за избори и именување која никако да дојде до предлог за нов спикер и гласање за истиот.

Затоа пратеничката од СДСМ Радмила Шеќеринска побара Собранието итно да се гласа за измена на дневниот ред и пратениците да се изјаснат по предлогот за избор на претседател на Собранието затоа што има поддршка од 10 пратеници, повикувајќи се на одредби од Деловниот кои го овозможуваат тоа.

– Во текот на седницата по предлог на претседателот, на предлагачот или на пратеник кого го поддржуваат 10 пратеници, а еве ги 62, Собранието без претрес одлучува по секој предлог да се гласа за измени во редоследот на претресот. И тие сите додавки што сега си ги додавате ги нема во Деловникот, рече Шеќеринска.

Во текот на дебатата предлогот за собирање на поддршка од 10 пратеници за менување на дневниот ред и гласање за нов претседател на Собранието ја даде пратеникот Оливер Спасовски од СДСМ на што се спротистави претседавачот Трајко Велјановски велејќи дека тоа не е во согласност со Деловникот, а пратеникот Илија Димовски посочи дека најпрво мора да заврши претресот на првата точка од дневниот ред и да се исцрпи листата на пратеници пријавени за зборување.