Сендвичарницата „Чичко Стоилко“ му отстапи место на барокот

Добивај вести на Viber

Култната скопска сендвичарница „Чичко Стоилко“ и уште неколку времени објекти до неа беа отстранети денеска за да се овозможи фасадата на заедничката зграда на ЕЛЕМ и ЕВН да биде реновирана. „Отстранувањето на сендвичарниците „Чичко Стоилко“, „Нино“ и уште два објекта е законска обврска на Општината која постапува по донесеното решение, а на барање на ЕВН за поставување нова барокна фасада на зградата. Сопствениците претходно ги добија писмените решенија за отстранување на нивните времени објекти. Најава за нивно отстранување имаше уште пред неколку години, поради уредување на просторот со околината која е главно во духот на проектот „Скопје 2014“, велат од општината. Киосците долго време го одбележуваат животот на Скопје, особено во централното градско подрачје. На нивно место е најавено дека ќе бидат поставени киосци исто така во барок-стил. Лузена Павловска, сопственичка на оваа скопска сендвичарница прашува како ќе продолжат да живеат сега, кога сендвичарницата е единствениот прилив на пари за нејзиното семејство но и за вработените кои се лојални повеќе од 30 години. „Ќе продолжиме со традицијата, мора поради татко ми. Револтирани сме, имаме многу вработени кои ќе останат без работа и што ќе прават додека се снајдат? Сите чекавме од оваа сендвичарница. Ни е криво што ова се направи баш вака“, вели таа за порталот А1он.