Сепак имало местење на судските предмети кај судиите
Објавено во: Македонија 07 Декември, 2017
Пo телефон, без писмена наредба и само со потпис на претседателот на Кривичниот суд, се делеле предмети кај судиите.
Финалниот извештај на комисијата од Министерството за правда по анализата на системот за електронската распределба на предмети АКМИС, покажува дека имало повеќе злоупотреби. Системот бил манипулиран, често се менувале распоредите во Кривичниот и Врховниот суд, а судии кои судат граѓанска материја се префрлани во казнена.
Министерот за правда, Билен Саљији, денеска го презентираше извештајот од проверките.
Не се користел модулот за автоматска распределба, а распределбата се вршела рачно, со што 860 предмети останале без доделен судија.
„Надлежните институции ќе утврдат дали се констатираните состојби исполнуваат законски битија на одредени инкриминации согласно Кривичниот законик“ – изјави Лазар Нанев, претседател на комисијата
Министерството за правда извештајот ќе го препрати до Судскиот совет, Основното јавно обвинителство и Специјалното јавно обвинителство, за да се утврди дали постојат елементи за разрешување судии или покренување кривична одговорност.