Шеќеринска вети минимална плата од 16.000 денари за сите
Објавено во: Економија 22 Ноември, 2016
Радмила Шекеринска, носителка на кандидатската листа на СДСМ и коалицијата во изборната единица 5 денеска од Битола вети минимална плата од 16.000 денари.
Објасни дека минималната плата ќе ја покачуваат секоја година до 16.000 денари, а тоа ќе важи за сите, и за оние од текстилната, и за оние од кожарската индустрија. Со ова смета дека младите ќе останат во Македонија, тука ќе најдат работа и ќе формираат семејства.
„Ќе обезбедиме финансиска помош од буџетот на Република Македонија да им помогнеме и на фирмите да обезбедат егзистенција за своите вработени. Целта на сево ова ни е просечната плата во нашата држава да изнесува 30.000 денари, а младите да добијат директна поддршка од државата, преку 10.000 евра неповратни сретства за да почнат бизнис и 2 години можност, тој бизнис да го водат во старт-ап центрите низ Република Македонија, каде што ќе имаат бесплатно сместување, нема да плаќаат за комуналии, нема да плаќаат за сметководство и сите пари ќе останат кај нив и нивните шанси за создавање бизнис ќе се зголемат“ - изјави Шеќеринска.
Таа додава дека лидерот на ВМРО-ДПМНЕ, Никола Груевски имал десет години за да го подобри животот на граѓаните, но не го сторил тоа.
Го обвини дека краде идеи од нивниот План за живот во Македонија и ги залажува граѓаните со минимални покачувања.