Што разговараа Могерини и Коѕиас за спорот за името?

Добивај вести на Viber

Прашањето за името на Македонија, Турција и Кипар се темите за кои вчера во Атина разговарала високата претставничка на Европската унија за надворешни работи и безбедносна политика, Федерика Могерини со грчките политичари. 

Таа се сретна со грчкиот премиер, Алексис Ципрас и шефот на дипломатијата, Никос Коѕиас.

Могерини ја истакна важноста на Балканот. Таа изјави дека регионот ќе биде приоритет за Унијата. Могерини се надева дека во наредните месеци ќе има повеќе можности да се направи напредок во разговорите меѓу Атина и Скопје за спорот околу името, и меѓу Приштина и Белград за тешкотиите кои ги имаат двете земји меѓу себе.

Коѕиас вели дека Грција во целост ги поддржува напорите на ЕУ за влез на Западен Балкан во европското семејство.  Коѕиас додаде дека „се надева оти решавање на прашањето за името сега ќе биде полесно отколку во минатото, со оглед на промената на власта во Македонија“. Тој додаде дека Атина ја поддржува целта на Скопје за влез во Унијата откако ќе биде решено прашањето за името.

Могерини истакна дека по последниот круг од преговорите за Кипар во Швајцарија има надеж мировниот процес да продолжи, кога политичките околности ќе станат соодветни.
Според владини извори, Ципрас изјави дека членството на Турција во блокот треба да зависи од решавањето на кипарското прашање.