Службен телефон се поголем „луксуз“ за македонските фирми

Добивај вести на Viber

Македонските фирми лани исклучиле околу 31.000 мобилни телефони, односно бил укинат секој десетти службен број за да ги скратат трошоците во услови на продолжена политичка и економска криза. Според податоците од Агенцијата за електронски комуникации, во 2016 година е забележан пад на деловните пост- пејд претплатници од 10,35 отсто, односно нивниот број на крајот од годината изнесува 269.101 корисник. Инаку, на крајот од претходната 2015 година мобилните оператори во земјава имале вкупно 300.158 деловни корисници.

Главната причина за вака драстичниот пад на деловните претплатници лежи пред се потешките услови за работа на фирмите поради силните политички потреси во последниве години, кои создаваа несигурна деловна клима. Многу фирми, за да опстојат во овие економски несигурни времиња преземаат мерки за штедење, со кои се откажуваат од дел од земените броеви.

Во ваква ситуација, и вообичаено високопрофитабилните телекомуникациските компании се соочуваат со намалени приходи од своите услуги. Во минатата година е забележан пад од 1,59 отсто на бројот на активни претплатници во мобилната телефонија во споредба со претходната година.

Податоците на АЕК покажуваат дека мобилните корисници лани разговарале речиси на исто ниво како во претходната година, односно оствариле минимално зголемување на реализираниот сообраќај во минути од 1,42 отсто. Но, воочливо е дека раст има единствено на сообраќајот во сопствена мобилна мрежа (6,04 отсто), додека се забележува силен пад на сообраќајот кон сите други дестинации, како мобилни (-10,58 отсто) и фиксни мрежи (-51,41 отсто) на други оператори, мрежи во странски држави (-25,50)  и во роаминг (-11,18).

Исто така, може да се забележи намалување на бројот на испратени СМС пораки во однос

на 2015 година кое изнесува 5,33 отсто, а кај вкупниот број на испратени ММС пораки во 2016 година има пад од 1,68 отсто во однос на претходната година.

(М.Б.)