Со купување новогодишни украси од Скопје Мериот Хотел, донирате за децата од СОС Детско село
Објавено во: Мои пари 19 Декември, 2016
Децата од СОС Детско село заедно со Скопје Мериот Хотел, изработија автентични и уникатни новогодишни украси кои ќе бидат наменети за продажба и донирање. Како гости на Скопје Мериот, во склоп на еднодневната креативна работилница, децата од овој центар креираа новогодишни украси од најразлични материјали и бои, што ги обезбеди хотелот. Рачно изработените украси се поставени на елката во Скопје Мериот од каде секој ќе може да купи еден или повеќе исо тоа да донира за СОС Детско село. За таа намена е поставена и донациска кутија од СОС Детско село.
„Мериот хотелите имаат традиција на соработка со СОС Детско село на глобално ниво. Тоа значи дека истата и одамна започната иницијатива ја пренесуваме и тука во Скопје, со што стануваме пријатели со децата од локалната организација и заеднички, со нивната креативност и детска инвентивност ги мотивираме граѓаните да ги купуваат нивните креации и со тоа да донираат и помогнат за подобрување на секојдневието на овие деца. Со вака осмислената акција ја будиме свеста на јавноста за потребите на овие деца и истовремено кај децата ги поттикнуваме позитивни вредности. “, изјави Пјотр Ленчевски, Директор за маркетинг и продажба во Скопје Мериот Хотел.
Целодневниот настан беше дополнет со предновогодишна забава за децата со присуство на дел од славните личности како Каролина Гочева, Влатко Лозаноски, бендот Eye Cue и задолжителниот Дедо Мраз кој им ги подели новогодишните подароци.