Со нов Закон ќе се деполитизира администрацијата

Добивај вести на Viber

Законот за висока раководна служба треба да овозможи деполитизација на администрацијата од врвот на пирамидата. Текстот на законот во наредните две недели треба да се објави на ЕНЕР, да добиеме коментари, а ќе организираме и јавни дискусии, изјави министерот за информатичко општество и администрација Адмирим Алити на онлајн дискусија.

Министерот Алити вели дека системот на висока раководна служба што се предлага треба да обезбеди постигнување на две клучни цели и тоа: прво, професионални високи раоводители избрани преку отворена и меритократска постапка врз основа на нивните професионални компетенции и второ, воспоставување на односи на доверба и одговорност  помеѓу политички избраните и именуваните лица и високите раководители.

Засега со овој закон, додаде тој, би требало да бидат опфатени 130 институции со идеја тој број да се зголеми. Институциите од локалната самоуправа засега нема да бидат опфатени со овој закон.

– Во овој нов предлог – закон, комисијата за висока раководна служба е утврдена како самостоен државен орган со својство на правно лице и со сопствен буџет и одговара пред Владата. Законот се одесува на секретарите во министерствата, директорите во органите на државната управа, директорите на директоратите и директорите на јавните претпријатија основани од Владата. Имплементацијата ќе оди паралелно ќе оди со процесот на реорганизацијата. Најпрво ќе се применува во МИОА, во Министерството за економија и во Министерството за земјоделство, шумарство и водостоанство - рече Алити.

Во насока на целосна деполитизација на администрацијата и воспоставување на систем на заслуги на процедурите за вработување во изминатиот период МИОА работеше и подготви три нови закони. Како што информираше министерот станува збор за законот за висока раководна служба, законот за вработените во јавниот сектор и законот за административни службеници.

– Овие три закони кои се меѓусебно поврзани се основа за целосно исклучување на политичките вијание и сите други влијанија во постапките за вработување во јавниот сектор - рече Алити.

Овие закони, како што нагласи министерот, се особено битни и намерата е во наредните месеци да бидат доставени во Парламентот.

Миша Поповиќ, од Центарот за добро управување при Институт за демократија истакна дека законот за висока раководна служба е долгоочекуван закон и тој е дел од пакетот реформи кои треба да ја професионализираат јавната служба и да обезбедат повисок квалитет на јавни услуги и спроведување на закони и политики.

– Се уште сме во очекување на финален текст на законот. Очекуваме дека декларираната спремност на политичкиот естаблишмент да се бори против притисокот ќе се материјализира во функционално законско решение кое ќе изгради доволно алатки за контрола што ќе обезбедат дека на позициите на висока раководна служба, раководството на администрацијата, агенциите и институциите чии менаџерите кои се професионално именувани дека во целиот тој процес ќе се именуваат најдобрите кадидати низ еден јавен процес, истакна Поповиќ.

Неда Малеска-Сачмароска, извршна директорка на Центарот за управување со промени сподели меѓународни искуства посочувајќи дека 75 проценти од земјите од ОЕЦД имаат висока раководна служба. Според Малеска-Сачмароска нашиот систем не обезбедува информации што работат и испорачуваат нашите раководни структури и овој закон треба да го подобри овој сегмент.

– Тоа е поголема одговорност и отчетност кон она што е спроведено и што е резултат на работењето на раководите. Воедно и да ги регулира клучните одговорности и надлежности во линиите на таа отчетност кон институциите - истакна таа.

„Фактор“ веќе објави дека Владата преку платформата ЕНЕР најавува носење на Закон за висока раководна служба.