Собраниската блокада го враќа стариот проблем со можни злоупотреби на екстра-лесното гориво

Добивај вести на Viber

Бензините и дизелот од денеска поевтинуваат за 2 денари, соопшти Регулаторната комисија за енергетика и водни услуги, појаснувајќи дека одлуката е донесена поради тоа што престанува да важи Уредбата со законска сила за примена на Законот за акцизите за време на вонредна состојба, со што практично од денеска во сила стапува Законот за акцизи.

Освен што од денеска ќе полниме поевтини гориво, по седум месеци изедначена цена денеска екстра-лесното гориво повторно поевтинува за 12 денари од дизелот и тоа во средина на грејната сезона.

Од причина што Уредбата за одредување на скалеста акциза престанува со важност од денеска, а измените на Законот со кои тоа требаше да се спроведе, се уште не се изгласани во Собранието, поради отсуство на кворум, повторно се отвара можност за злоупотреба на екстра лесното гориво.

Нелегалното користење на екстралесното гориво во транспортот предизвикува буџетот на државата да губи по 12 денари од литар, а ефектите врз екологијата и здравјето на граѓаните се застрашувачки.

За овие злоупотреби Министерството за финансии лани изработи и Анализа, според која „изедначувањето на малопродажните цени на екстралесното и дизелот ќе резултира со губење на економскиот мотив за злоупотреби“, но немањето одлука во парламентот отвара сомнеж дека некои политичари во нашата земја даваат поддршка на ваквите злоупотреби.

Неможноста на партиите да постигнат кворум во Собранието, најпрво ќе го плаќа животната средина, а потоа и бизнисите и граѓаните кои повторно нема да бидат сигурни во квалитетот на горивата.