Спасовски: Бегството на Грујовски и Бошковски не е неуспех на македонската полиција, туку на трулото судство
Објавено во: Македонија 28 Јули, 2017
Бегството на Горан Грујовски и на Никола Бошковски не е неуспех на македонската полиција, тоа покажува колку е труло македонското судство, изјави министерот за внатрешни работи, Оливер Спасовски.
Министерот вели дека одговорноста за бегањето на поранешниот директор на петтата управа и на неговиот соработник треба да се бара кај судиите.
„За ова треба да се понесе одговорност бидејќи беше оставено време овие луѓе да заминат, без разлика дали некаде се кријат во државата или надвор од неа. Ова треба да биде силна порака и многу голема поука за реформите што претстојат во правосудниот систем на Република Македонија“ – изјави Спасовски.
Тој рече дека е време да се побара одговорност од лицата што овозможуваат криминалците да се шетаат на слобода и да се одредуваат мерки што не можат да бидат ефектуирани во одреден временски период.
За лицата кои се во бегство, Спасовски рече дека кога ќе имаат нови информации ќе ја информираат јавноста. Тие се обвинети од Специјалното јавно обвинителство во случаите „Тврдина“ и „Таргет“. Tимовите на МВР извршија проверка на објектите на адресите кои се пријавени како места на живеење на осомничените и проверки на повеќе локации на територијата на Република Македонија, поточно во Скопје, Велес и Охрид, но лицата не беа најдени.