Стојаноска: ВМРО-ДПМНЕ не ги повлекува амандманите
Објавено во: Македонија 09 Март, 2018
Опозициската ВМРО-ДПМНЕ нема намера да ги повлече 35 илјади амандмани за Законот за употреба на јазиците и покрај обидите тие да бидат оспорени од страна на владејачкото мнозинство. Овој став го потврди и Дафина Стојаноска во емисијата „Акцент“ на МТВ.
„Тоа право ни го дава деловникот на Собранието на Република Македонија, Уставот и непотпишувањето на законот од страна на Претседателот на Република Македонија, рече Стојаноска член на Извршниот Комите на ВМРО-ДПМНЕ и пратеник во Собранието на Република Македонија.
Таа потенцираше дека ставот на ВМРО-ДПМНЕ е јасен, а тоа е дека тие немаат ништо против Албанците, но како што рече, сакаат да се унапредат и другите јазици на заедниците, додека овој закон го фаворизира само албанскиот јазик, а со тоа може да ја продлабочи кризата помеѓу граѓаните. За Стојаноска поголем приоритет се законите кои се од интерес на сите граѓани на Република Македонија, а не законите кои што се носат по скратена постапка и закони кои што се носат без присуство на опозицијата.