ТЕРЕЗА МЕЈ ОДЛУЧНА: Британија го напушта единствениот пазар на ЕУ
Објавено во: Свет 17 Јануари, 2017
Велика Британија треба да го напушти единствениот пазар на Европската унија и нема да ги почитува четирите слободи, вклучувајќи и слободата на движењето, и нема да плаќа големи придонеси на Брисел. Ова го изјави британската премиерка Тереза Меј во долгоочекуваниот говор при претставувањето на стратегијата за Бегзит.
Меј е категорична дека „никаков договор е подобро од лош договор“. Според неа иако Лондон нема да бара членство во единствениот пазар, ќе се стреми кон „што е можно поголемиот пристап до него“. Тоа значи дека Велика Британија и другите земји членки на ЕУ ќе тргуваат меѓу себе според правилата на Светската трговска организација (СТО).
Таа истакна дека приоритет за земјата ќе биде трговијата со другите делови на светот - Нов Зеланд, Канада, Австралија, САД, Индија, Пакистан, Бангладеш, земји во Африка и сл.
Премиерот на Велика Британија објави дека ќе биде затегната контролата на увоз во земјата, но ќе се гарантираат правата на граѓаните кои доаѓаат од ЕУ, како и на британските државјани кои живеат во држави од ЕУ.
"„Велика Британија ќе се повлече од Европскиот суд и сите закони ќе бидат создадени во британскиот парламент“, изјави Тереза Меј. Според неа земјата гласа за посветла иднина и Брегзит ќе ја направи посилна и пообединета.
Таа објасни дека конечниот договор ќе биде изгласан во британскиот парламент, но не коментира што ќе се случи ако не биде одобрен.