ТЕТЕКС лани со одлична добивка од 552 илјади евра, пресудни се приходите од ТТК Банка

Добивај вести на Viber

Компанијата „Тетекс“ во минатата година остварила добивка во износ од 33,99 милиони денари, или 552 илјади евра, стои во неревидираниот биланс на успех на компанијата. 

Во однос на минатата година добивката е само малку намалена, за шест проценти. 

„Оперативните приходи изнесуваат 232.592 илјади денари. Приходите од продажба изнесуваат 167.662 илјади. Се состојат од продажба на производи и стоки на домашен пазар 89.881 илјади денари, продажба на производи и стоки на странски пазар 77.781 илјади денари“, се вели во извештајот.

Структурата на приходите остварени на домашен пазар е следна: приходи од  продажба на производи и стоки во износ од 51.173 илјади денари, приходи од закупнини 29.059 илјади и приходи од други услуги 9.649 илјади.

„Тетекс АД во своето работење претежно се ориентира кон издавање на слободни простори под закуп на други правни лица, дејност која значително учествува во вкупните приходи на компанијата; што може да се види од наведените показатели. Останатите оперативни приходи во кои се вклучени приходите  од продажба на недвижен имот изнесуваат 20.861 илјади денари. Оперативните расходи изнесуваат 225.993 илјади денари, а истиот период 2018 година изнесуваа 274.363 илјади денари. Оперативната загубаизнесува 4.805 илјади денари“, се вели во соопштението. 

Во финансиските приходи се вклучени приходите од дивиденда кои Тетекс ги оствари во ТТК Банка во износ од 39.590 илјади денари, или 643.739 евра, соопштија од компанијата.

„ТЕТЕКС АД во постоечките услови на работење перманентно  настојува да ги задоволиочекувањата на  купувачите, акционерите, вработените и добавувачите“, се вели во соопштението.