Тихомир Петрески нов директор на Триглав Пензиско друштво

Добивај вести на Viber

Тихомир Петрески е нов член и претседател на Управниот одбор на Триглав пензиско друштво АД Скопје.

Друштвото извести до Македонска берза дека доскорашниот претседател на Одборот Војдан Јорданов го прекинал работниот ангажман, а дека Петрески доаѓа на позицијата од 1 април 2021 година. Маријан Николовски и натаму продолжува да ја врши функцијата член на Управниот одбор на Друштвото.

Петрески доаѓа во Триглав пензиско друштво од позицијата генерален менаџер и основач на ПЕТРЕСКИ и ПАРТНЕРИ дооел Скопје. Зад себе има значајно професионално искуство во корпоративниот сектор, стекнато на повеќе раководни функции на домашниот и на интернационалните пазари за време на својата професионална кариера и повеќегодишно наставно искуство со активно учество во формалното и неформалното образование.

„Ми претставува привилегија и задоволство да бидам дел од тимот професионалци, кои раководат со компаниите членки на Групацијата Триглав. Воедно, предизвикот е уште поголем, затоа што станува збор за одговорна улога во управувањето со најмладиот член, како на Групацијата така и во реформираниот пензиски систем, и ќе ги вложам сите мои професионални капацитети во насока на остварување на заедничката цел, друштвото да се позиционира како атрактивен избор за капитално финансирано пензиско осигурување на македонскиот пазар, вели Петрески.

Триглав пензиско друштво е дел од Групација Триглав, една од најголемите осигурително-финансиски групации во ЈИ Европа. Со работа започна во 2019-та година и во неговиот фокус е грижата за интересите на членовите на фондовите со коишто управува преку постигнување што подобар инвестициски резултат.