ТРАМП СО ЖЕСТОК НАСТАП КОН ТЕРЕЗА МЕЈ: Ја урна фунтата и направи хаос за помалку од 24 часа
Објавено во: Свет 13 Јули, 2018
Британската фунта денес падна, а политичарите во Обединетото Кралство се во шок од „торнадо-нападот“ на претседателот на САД Доналд Трамп, извести агенцијата АП.
Tрамп, како се додава, ја понижил премиерката Тереза Меј, ги изгасил надежите за постигнување на американско-британски трговски договор и ги охрабрил противниците на Меј во ризичен судир околу Брегзит, „и тоа за помалку од 24 часа престој во Британија“.
Фунтата паднала за 0,6 посто на 1,31 долар на претпладневното тргување во Лондон, а владата на Меј се „труди да изгледа како се да се одвива како што треба со претседателската посета која добила неочкеуван пресврт“.
АП потсетува дека Трамп во интервју за весникот „Сан“ ги осудил плановите на Тереза за Брегзит и го пофалил нејзиниот политички ривал Борис Џонсон. Исто така ја критикувал имиграцијата и рекол дека градоначалникот на Лондон, муслиманот Садик Кан, не успеал да го запре тероризмот.
Во една од благите реакции на интервјуто на Трамп, британскиот министер за високо образование Сем Гајмах напишал на Твитер: „Каде ви се манирите, господине претседателе?“, пренесува американската агенција.
Foto: АП