Добивај вести на Viber
Еден од сопствениците на пропаднатата Еуростандард банка, Трифун Костовски, најавува дека ќе покрене пријава за клевета против претседателот на Здружението на оштетени штедачи, Петар Трајков.
Ова Костовски го најави на својот фејсбук профил, изнесувајќи повеќе обвинувања за Трајков, за кого како што вели, досега молчел, но сега решил да ја каже вистината.
„
Повеќе од јасно е дека ова Здружение на оштетени штедачи од ЕСБ Банка,
кои велат дека ги има 3.000 оштетени семејства, се служат со манипулативни податоци. Согласно информациите кои ги поседуваме, 791 физичко лице имаат побарувања од Еуростандард банка. Поради континуирана клевета од страна на претседателот на ова здружение, именувајќи ме како криминалец, ќе покренам кривична пријава за клевета точно против лицето Петар Трајков. Господинот Петар Трајков на кого му ја доверивте палката да ве претставува, вас оштетените штедачи, за жал не е човек на кому му се доверува оваа многу значајна позиција“, пишува Костовски. Натаму во својот пост на фејсбук Костовски изнесува интересни детали.
„Дали личи на претседателот на оштетените штедачи да ми каже при првата средба цитирам; зошто не и дадовте 100-200 илјади евра на Гувернерката за да не ја носи банката во стечај? Вчудовиден бев и избезумен од ваквиот настап на вашиот прв човек, да при втората средба повторно ме подучува со мито да им пријдам кон судиите на Уставниот суд, со цел носење на одлука во корист на штедачите, за на крајот да финишира со зборовите, цитирам: Ти го отстапувам моето побарување од Еуростандард банка за 50 отсто, ти да ме исплатиш, бидејќи ти имаш добри релации со Заев“, пишува Костовски.
Тој објаснува дека немал намера да озборува, но, како што вели, однесувањето на господинот Петар Трајков е крајно дволично, недолично, исклучиво бранејќи го сопствениот интерес.
„Време е да согледате кој ви е вистински пријател во оваа борба, а кој непријател. Изразувам жалење за вашите пари, чија судбина е неизвесна, меѓутоа на начинот на кој комуницирате со институциите на државата, со јавноста и посебно со мене е недозволиво. Повторувам, јас сум тука и не бегам доколку имам вина“, пшишува Трифун Костовски на својот фејсбук профил.