Тупанчески ја пушти во употреба новата судница во затворот Идризово
Објавено во: Македонија 30 Ноември, 2022
Министерот за правда Никола Тупанчевски во затворот Идризово ја пушти во функција најголемата дигитална судница. Објектот се простира на површина од 1.089 м2 со капицитет за 120 лица.
Ова е најголемата и најопремената судница во земјата со судска сала од 290 м2. Таа е само еден сегмент од целокупниот комплекс за оваа намена кој меѓудругото содржи и простории за обвинетите, посебни канцеларии за судиите и јавните обвинители, простории за адвокатите, најсовремен систем за заштита на сведоци со можност за изобличување на слика и тон, систем за видеоконференција, кабина за преведувачи, како и соодветен безбедносен и мониторинг систем. Комплексот располага со посебни влезови за осудени лица, за службени лица, како и за јавноста која ќе присуствува на овие судења и посебен дел за новинарите.
Вкупната вредност на изградбата на објектот изнесува 1,3 милиони евра од кои речиси 975 илјади евра се обезбедени преку ИПА акциската програма. Тупанчески посочи дека судницата нуди најсовремени услови за изведување на судски процеси. Функционалниот аудио-конференциски систем со кој располага судницата дава можности за судења без физичко присуство на учесниците во судските процеси и слично.
- Користењето на оваа судница ќе има сериозен импакт во насока на намалување на трошоците за судските процеси за обезбедување и транспорт, кои значително ќе се редуцираат.Ќе се обезбеди поголема заштита на безбедноста и сигурноста на граѓаните на главниот град и нема да се наруши непреченото, нормално функционирање на градот преку блокирање на сообраќајот.Првото судење во најголемата дигитална судница во Идризово ќе се одржи на 14 декември, рече Тупанчевски.