Тупанчески: Некој функционер го искористил дискреционото право овозможувајќи предвремено полагање на правосудниот испит
Објавено во: Македонија 30 Ноември, 2022
Министерот за правда Никола Тупанчески, одговарајќи на новинарски прашања за положениот правосуден испит на Барлет Џафери во 2015 година рече дека некој функционер го искористил дискреционото право за предвремено полагање.
,,Доколку навистина постојат случаи кои се граничат со примената на законот, тогаш би требало да реагираат и другите институции. Целата состојба треба да се провери. Не се работи за еден случај, туку се работи за примена на дискреционо право на именуван функционер. Дефинитивно, некој го искористил тоа дискреционо овластување и токму затоа од тие причини законот е изменет за да не постои никаква можност во иднина. Јас 10 месеци сум министер, не сум ни помислил да дадам некој предвремено да полага правосуден испит”, изјави Тупанчески.
Министерот Тупанчески посочи дека станува збор за три законски акти од Законот за правосуден испит донесен во 2013 година. Измените и дополнувањата се направени во 2015 година, а во 2019 година е донесен нов Закон за правосуден испит.
Билјана Ивановска од Антикорупциската комисија рече дека Џафери не бил единствен таков пример.
Таа негира дека не сакале да постапуваат, туку едноставно ги исцрпиле инструментите и истрагата со тоа завршила.
За случајот, критика упати и познатата адвокатка Сузана Јошевска Анастасовска.